Кинотеатрларда тыюу салынган "Өч 2" тасмасын интернеттен көрсөтүүгө уруксат берилди

“Өч 2” тасмасын онлайн “Этномедиа” платформасынан көрсөтүүгө уруксат берилди. Бул тууралуу “Азаттыкка” тасманын продюсери Ренат Русланов билдирди. Анын айтымында, тасма платформада “21+” деген чек менен көрсөтүлөт. Маданият, маалымат жана жаштар саясаты министрлиги “Өч 2” көркөм тасмасын өлкө аймагында көрсөтүүгө 13-апрелде тыюу салган. Чечим Кинематография департаментинин комиссиясы “тасмада зомбулук жана адеп-ахлакка жат көрүнүштөр бар, тарбиялык мааниси жетишсиз” деп тапкандан кийин кабыл алынган.