Kosova me nivelin më të ulët të punësimit të grave në rajon

Flutura Berisha, 43 vjeçe, për më shumë se tre vjet është në kërkim të një pune. Pagat e ulëta që ofrohen në sektorin privat, thotë Flutura, kanë bërë që edhe kur ka arritur të gjejë një punë, të mos e pranojë. “E kam familjen, jam nënë e katër fëmijëve, nëse paga është e ulët ato para të shkojnë vetëm rrugë, nuk mund të bësh asgjë me ato para”, thotë ajo. “Tash jam në shtëpi dhe angazhohem me punët e shtëpisë dhe kujdesem për fëmijët. Nuk kam gjetur punë aty ku kam dashur”, thotë ajo për Radion Evropa e Lirë.