Уфа «Нур» театрында «Тау»: гашыйклар, өмет, әманәт һәм бульдозер турында спектакль

Илдар Юзеевның «Гашыйклар тавы» әсәре буенча куелган «Тау» спектаклен премьерага кадәр карадык. Соңгы прогоны, тапшырылуы булгандыр, һәрхәлдә без аның иң беренче тамашачылары идек. Спектакль караганда берничә мәртәбә «Илдар абый исән булса, ничек сөенер иде» дигән уй сызылып үтте. Аның белән бер кабинетта эшләгән кеше буларак, аның пьесаларын куйдырасы килеп ничек өзгәләнгәнен яхшы хәтерлим. Юк, Казанда режиссер Равил Тумашевтан соң аның нечкә күңеле аша өзелеп чыккан пьесаларын аңлаучы табылмады, ни кызганыч.