Алиссон Салоҳ атрофидаги вазиятга нуқта қўйди ва жамоани бирлаштирди

«Ливерпуль» атрофида охирги кунларда юзага келган шов-шувли вазият футбол жамоатчилигининг диққат марказида турибди. Мисрлик суперюлдуз Муҳаммад Салоҳнинг кетма-кет уч беллашувда асосий таркибда бўлмаслиги, шундан кейин эса клубнинг унга бўлган муносабати ҳақида очиқча танқид билдириши табиий равишда катта муҳокамаларга сабаб бўлди. Салоҳнинг «Мен АПЛ чемпиони бўлдим, бу авлодда энг кўп гол ураяпман. Нима учун бу бундай тугаши керак?» деган сўзлари мухлислар орасида ҳам турлича фикрлар уйғотди.