Ирада Әюпова: Лаекмы без бу бинага? Минем бу сүзләремне әйләндереп бетерәчәкләрен аңлыйм

Мәдәният министрының журналистлар белән быелгы җәйге очрашуы өчен «Мир» кинотеатры сайланган иде. Министр килгәнче экскурсия була, дигәч аптырашта калган идек: кеп-кечкенә кинотеатрда экскурсиялек урын бармыни дисәк, бар икән – киномеханик будкасы.

Әлеге абзац өлкән буын өчен кызыклы булырга мөмкин. Биредә безгә өзелгән кинотасманы скотч белән ябыштырып куя торган җайланманы да күрсәттеләр. Күз алдына китерегез: залда кино өзелгәнгә ризасызланып тамашачы сызгыра, өстәге будкасында киномеханик абзый ашыга-ашыга кинотасма ялгый.