Чаллыдагы концертында Филүс Каһиров тормыш иптәше Эльмирага сюрприз ясады

Чаллыда узган сольный концертында Татарстанның халык артисты Филүс Каһиров тормыш иптәше Эльмира Каһировага җыр багышлады. Шушы көннәрдә генә Эльмираның туган көне булып узган икән. Җырчы хәләл җефетен гомер бәйрәме белән котлап, аның үзенә бик зур терәк булуын билгеләп үтте, кат-кат рәхмәтләрен җиткерде.

«Кышкы романс» җырын башкарган вакытта, залда тавыш операторларына ярдәм итеп утырган хатыны янына төшеп, аңа чәчәк бәйләме дә бүләк итте. Филүс белән Эльмира ярымкараңгы залда озак кына кочаклашып басып тордылар.