Роберт Әхмәтҗановны искә алдык: Шагыйрьнең биографиясе – шигырьләрдә

«2025 елның азагы әдәбият өлкәсендәге вакыйгаларга бик бай булды», – дип башлады чыгышын күренекле татар шагыйре Роберт Әхмәтҗановның тууына 90 еллыкка багышланган әдәби-музыкаль кичәдә Татарстан мәдәният министры урынбасары Дамир Натфуллин.

Әйе, быел ел азагына таба әдәби-музыкаль кичәләр бер-бер артлы үтеп кенә торды: Казанның төрле сәхнәләрендә Хәсән Туфанны, Лена Шагыйрьҗанны, Гариф Ахуновны, Туфан Миңнуллинны, Мөхәммәт Мәһдиевны искә алдык, моңа әле бихисап узган китап презентацияләрен дә кушып була.