Мартта ике тапкыр озын яллар була

Татарстанда биш көнлек эш атнасы буенча эшләүче кешеләрне март аенда берьюлы ике озын ял көтә. Бу турыда «Татар-информ» яза.

Татарстан халкы өчен беренче озын ял көннәре 7–9 мартка туры килә. Бу Халыкара хатын-кызлар көне уңаеннан билгеләнә. Быел 8 март якшәмбегә туры килгәнгә, өстәмә ял көне бәйрәмнән соңгы эш көненә — 9 мартка күчерелә.

Моннан тыш, Татарстанда 20–22 мартта да өч көн рәттән ял көтелә. 20 мартта республикада Ураза бәйрәме билгеләп үтелә, әлеге көн Татарстанда бәйрәм һәм эшләми торган көн булып санала.