«Мәхәббәтле репортаж»: Илнат Фәрхуллин белән кәләше Регина туеннан истә калганнар

Мәхәббәт иленә сәяхәт

Кеше тормышында бик тә мөһим этаплар бар. Өйләнешү гомерлеккә истә калырлык була. Ихлас елмаюлар, пар килгән яшьләргә бәхет теләп аккан күз яшьләре, татлы булса да, әче дип үбешүләр, якын кешеләр... Кичә Казан янындагы матур бер ресторанда Татарстанның атказанган артисты Илнат Фәрхуллин белән Башкортстанның атказанган артисты Регина Гәрәева өйләнеште. Нәкъ менә кичә алар ике йөздән артык шаһит каршында гомергә бергә булырга, мәхәббәт хисен түкми-чәчми сакларга вәгъдә бирде.