Татар тарихына 2024 елда язылган вакыйгалар: чәкчәкнең танылган чагы, Киләчәк уеннары

Узган 2024 ел – Аҗдаһа елы 28 яшьлек гвардия капитаны Айнур Сафиуллинга Россия Герое исеме бирелүе һәм «Алтын йолдыз» тапшырылуы белән башланып киткән иде.

«Бу, әлбәттә, минем тормышымда бик зур вакыйга. Мин, мөгаен, моның турында хыяллана гына алганмындыр. Президентны беренче тапкыр күрүем һәм аның кулыннан шундый бүләк алуым белән горурланам. Бүләкләү вакытында минем эчемдә дулкынлану бар иде. Бүләкләү бик тантаналы булды. Анда 10 Россия Герое бар иде. Барыбыз да бер-беребез өчен шатланып, аралашып алдык.