10нчы «Fashion iftar»: зәңгәр, күк төсе, мөселман модасы һәм яңа үзәк

Быелгы «Fashion iftar»ның төсе – зәңгәр, күк төсе иде. «Дресс-код бу төсләргә 100 процент туры килергә тиеш», — дип тә кисәттеләр «Татар-информ»да узган матбугат конференциясендә. Шуңамы, чарада бу төсләрдән тайпылган кешеләр күренмәде. Һәм «Казан Экспо» бу көнне әкрен, салмак кына ага торган елганы хәтерләтте. Шунда бер катнашкан апа әйтмешли: «Зәңгәр төс күпләргә килешә. Күзләргә дә рәхәт».

Чара татар гореф-гадәтләренә һәм мәдәниятенә багышланган иде. Темасы – ирек. Бу ирек киемнәрнең төрлелегендә дә чагылды.