Анчелотти мағлубиятдан кейин жамоа ўйинига холис баҳо берди

Бразилия миллий жамоаси бош мураббийи Карло Анчелотти Францияга қарши ўртоқлик учрашувидан кейин ўз мулоҳазалари билан ўртоқлашди. 1:2 ҳисобида якунланган баҳсда натижа бразилияликлар фойдасига ҳал бўлмаган бўлса-да, мутахассис ўйин мазмунига алоҳида эътибор қаратди.

Анчелоттининг таъкидлашича, ҳар қандай мағлубият хурсандчилик учун сабаб бўла олмайди. Бироқ бундай натижалар жамоанинг кучли ва заиф жиҳатларини аниқ кўрсатиб беради. Унинг фикрича, жамоа охиригача курашди ва бир нечта хавфли имкониятлар яратишга муваффақ бўлди.