Аббосбек Файзуллаев жамоасига Каннаваро бош мураббий бўлиши мумкин

Аббосбек Файзуллаев тўп сураётган Москва ЦСКА клуби янги бош мураббий қидирмоқда. Турли манбаларда тарқалган маълумотларга кўра, жамоа раҳбарияти италиялик машҳур мутахассис Фабио Каннаварони ушбу лавозим учун асосий номзод сифатида кўриб чиқмоқда.

Футбол инсайдери Жанлука Ди Марционинг хабар беришича, 51 ёшли мутахассиснинг номзодига шахсан клуб президенти Евгений Гинер катта эътибор қаратмоқда. ЦСКА жамоаси бош мураббийи Марко Николичнинг кетганидан сўнг, жамоа бошқаруви бўш қолганди ва бу позицияни тўлдириш долзарб масалага айланган.