Казанда март башыннан тугызынчы температура рекорды яңартылды

Март башыннан Татарстан башкаласында тугызынчы температура рекорды яңартылды. Бу хакта ТР Гидрометеорология үзәге хәбәр итә.

Кичә, 25 мартта, «Казан» метеостанциясендә термометр баганалары +11,3 градуска кадәр күтәрелде.

ТР башкаласында язның беренче аеның 25 нче числосы өчен һава температурасының алдагы абсолют максимумы бер ел элек, 2025 елда, шул ук «Казан» метеостанциясендә һәм «Казан-Сокол» авиация метеостанциясендә теркәлгән булган. Алар +10,4 һәм +10,8 градус тәшкил итте.