Песошин һәм Сатретдинов «Закон территориясе» конкурсында җиңүчеләрне бүләкләде

Татарстан Премьер-министры Алексей Песошин һәм Татарстан Республикасы буенча эчке эшләр министры Дамир Сатретдинов «Закон территориясе» конкурсында җиңүчеләрне бүләкләү тантанасында катнашты. Бу хакта ТР Хөкүмәте матбугат хезмәте хәбәр итә.

Бәйге республикада ТР буенча Эчке эшләр министрлыгы тарафыннан 2007 елдан үткәрелә, ә 2012 елдан Татарстан Хөкүмәте химаясендә уза. Аның максаты - җәмәгать тәртибен тәэмин итү, яшьләргә хокукый тәрбия бирү һәм хокук бозуларны профилактикалау өлкәсендә иң яхшы тәҗрибәләрне ачыклау һәм тарату.