Татарстанда 60+ яшьтәге катнашучылар өчен «Хәрәкәттә бәрәкәт» ГТО онлайн-акциясе башланды

Татарстанда 5-26 июньдә Бөек Ватан сугышында Җиңүнең 80 еллыгына багышланган «Хәрәкәттә бәрәкәт» ГТО тапшыру республика онлайн-акциясе уза. Анда муниципаль районнарда яшәүче 60 яшьтән өлкәнрәк кешеләр (ир-атлар 65 яшьтән башлап) катнаша ала. Бу хакта ТР Спорт министрлыгы хәбәр итә.

Катнашучыларга бер минутка кадәр озынлыктагы видеоролик яздырып җибәрергә кирәк. Видеоязмада алар үзләренең яшь категориясенә туры килгән ГТО нормативларын үтәргә тиеш. Видеода ГТО символикасы белән элементлар булу шарт.