Боз астына киткән 4 кешене коткарган татарстанлыларны МЧС бүләкләячәк

Татарстанда боз астына төшеп киткән кешеләрне күреп, аларны коткарып калган шаһитларны Гадәттән тыш хәлләр министрлыгы бүләкләячәк. Бу хакта «Татар-информ»да узган матбугат конференциясендә Россия Гадәттән тыш хәлләр министрлыгының ТР да баш идарәсе су объектларында кешеләр иминлеге бүлеге җитәкчесе Регина Гаязова сөйләде.

«Быел Татарстанда 14 кеше суга батудан коткарып калынды. Шуларның дүртесен, шул исәптән, ике баланы аларның батканын күргән кешеләр коткарган», – дип сөйләде ул.