Казанның Мәрҗани мәчетендә мәхәллә җыелышы утырышы узды. Көн тәртибендәге төп мәсьәлә – яңа имам-хатыйб сайлаудан гыйбарәт булды. Мәчет имамы итеп бертавыштан мөфтинең мөхтәсибәтләр белән эшләү буенча урынбасары, Татарстанның көньяк төбәге казые Равил хәзрәт Зөфәров билгеләнде. Сайлаудан соң аның кандидатурасын Татарстан мөфтие Камил хәзрәт Сәмигуллин раслады. Утырыш тәмамлангач мөфти имзасы белән Равил хәзрәткә Шәһадәтнамә – вазыйфага билгеләнүе турында таныклык тапшырылды. Бу хакта Татарстан Диния нәзарәте матбугат хезмәте хәбәр итә.