Marynyň käbir sebitlerinde ilat bir gije-gündiz elektriksiz galdy, Tejende ýyladyş turbalary ýygy-ýygydan hatardan çykýar

Türkmenistanyň gündogar-günorta sebitlerinde howanyň temperaturasy gijelerine 0 gradusa çenli aşaklaýan mahaly, ilatyň ýylynmak meselesindäki bökdençlikler ýitileşýär. Mary welaýatynyň birnäçe etrabynda ilatyň elektrik üpjünçiligi azyndan bir gije-gündizläp kesildi. Ahal welaýatynyň Tejen etrabynda ýyladyş turbalarynyň deşilip, hatardan çykmagy we ilatyň ýyladyş ulgamlarynyň işlemezligi bilen bagly ýagdaýlar ýygjamlaşdy. Bu ýagdaýlar barada Azatlyk Radiosynyň habarçylary 22-nji dekabrda Marydan we Ahaldan maglumat berdiler.