Aşgabadyň Halkara howa menzilindäki parahorluk açyk syr - çeşmeler

Daşary ýurtlara sapar edýän türkmenistanlylar ýurduň howa menzilinde ýolagçylaryň goşlaryny barlaýan esgerleriň özlerini para bermäge mejbur edýändigini aýdýarlar. Azatlyk bu hili maglumatlary mundan öň hem alypdy, emma ýurt maglumat üçin ýapyk bolansoň, bu aýdylýan parahorlugyň möçberlerini, şeýle-de, bu mesele bilen bagly jogäpkärçilige çekilen işgärleriň bolup-bolmandygyny resmi taýdan tassykladyp hem, inkär etdirip hem bolmaýar. Aşgabat şäherinden Kazana uçan daşoguzly zenan Azatlygyň habarçysyna öz başdan geçiren wakasyny gürrüň berdi.