Türkmenistanly agyr atletikaçylar Peruwdaky çempionatda 12 medal gazandy

Türkmen agyr atletikaçylary Peruwyň paýtagty Lima şäherinde tamamlanan ýetginjekleriň (U17) we ýaşlaryň (U20) arasynda geçirilen dünýä çempionatynda 12 medal, ýagny 2 altyn, 7 kümüş we 3 bürünç medal gazandylar. Bu barada türkmen resmi neşirleri 8-nji maýda habar berdi. Maglumatda 1-6-njy maý aralygynda geçirilen çempionata 77 ýurtdan gelen 531 türgeniň gatnaşandygy, şeýle-de Türkmenistana ýedi agyr atletikaçynyň, ýagny ýaşlaryň ýaryşynda 4 oglanyň we ýetginjekler ýaryşynda 3 gyzyň wekilçilik edendigi aýdylýar.