Türkmen döwlet biržasy 37 million dollardan gowrak söwda etdi

Türkmenistanyň Döwlet haryt-çig mal biržasy geçen hepdede daşary ýurt puluna 37 million 320 müň dollarlyk söwda etdi. Döwlet mediasynda 23-nji dekabrda çap bolan maglumata görä, Birleşen Arap Emirlikleriniň hem-de Owganystanyň işewürleri «Türkmennebit» döwlet konserniniň kärhanasynda öndürilen az kükürtli ýangyç mazudyny, suwuklandyrylan gazy daşary ýurt puluna satyn alypdyr. Mundan başga-da, daşary ýurt puluna Serbiýanyň işewür toparlarynyň wekilleri guradylan buýan köküni we buýan köküniň baldagyny satyn alypdyr.