Садҳо донишҷӯи тоҷик аз Русия ихроҷ шудаанд

Соли 2025 қариб 600 донишҷӯи тоҷикро аз Русия ихроҷ кардаанд. Ин оморро Лутфия Абдулхолиқзода, муовини вазири маорифи Тоҷикистон 30-юми январ дар нишасти хабарӣ эълон кард. Ба гуфтаи муовини вазир, 600 донишҷӯи рондашуда дар донишгоҳҳои Тоҷикистон таҳсилро давом доданд. Лутфия Абдулхолиқзода афзуд, моҳи ноябри соли гузашта дар нишасти ҳайатҳои Тоҷикистон ва Русия масъалаи ихроҷи донишҷӯёни тоҷик аз Русия баррасӣ шуд ва иҷозаи бозгашти 730 донишҷӯ ба даст омад. Инҳо донишҷӯёне будаанд, ки давоми ду соли ахир аз Русия ихроҷ шуда буданд.