"Як мошин зери тарма монд". Барф роҳи Душанбе-Чаноқро баст

Дар пайи боридани барфи зиёд роҳи Душанбе-Чаноқ, ягона масир миёни вилояти Суғд ва шаҳри Душанбе баста шудааст. Рӯзи 21-уми январ як мошин дар ин роҳ зери тарма монд, аммо ронанда ва мусофиронашро наҷот додаанд. Дафтари матбуоти ширкати IRS, ки масъули нигоҳбини роҳ аст ба Радиои Озодӣ гуфт, давоми ду рӯзи ахир дар ин масир 29 тарма фаромадааст ва барои ҳамин ҳаракати ҳама гуна воситаи нақлиёт муваққатан манъ шуд. Ҳанӯз маълум нест, ки роҳ кай боз мешавад. Намояндагони ширкати IRS мегӯянд, роҳро аз барф тоза карда истодаанд.