Модари 5 фарзанд худро аз болои пул ба дарё партофтааст

Кумитаи ҳолатҳои фавқулодаи Тоҷикистон хабар додааст, ки як занро аз ғарқшавӣ наҷот додаанд. Ориф Нозимиён, сухангӯи Кумита дар хабарномае навиштааст, Абдурасулова Б. сокини 28-солаи ноҳияи Хуросон ва модари 5 фарзанд, шоми 19-уми июл худро аз болои пул ба дарёи Вахш партофт. Сабаби даст ба ин кор задани зан маълум нест. Сухангӯи Кумитаи ҳолатҳои фавқулода мегӯяд, наҷотдиҳандагон занро 500-600 метр поёнтар аз ҷойи партофташуда зинда аз об бароварданд. Занро дар Бемористони ноҳияи Кушониён бистарӣ кардаанд ва аҳволи ӯ хуб гуфта мешавад.