Nevojë apo zgjedhje? Gati gjysma e lindjeve në Kosovë bëhen me operacion

Me foshnjën pranë vetes, Arlinda paloste rrobat e vogla të saj në valixhe - gati për të shkuar në shtëpi. Në Klinikën e Gjinekologjisë të Qendrës Klinike Universitare të Kosovës (QKUK) në Prishtinë, ajo solli në jetë fëmijën e parë - me peshë gati tre kilogramë. Ishte një moment që e kishte pritur dhe imagjinuar gjatë gjithë shtatzënisë. “Normalisht, jam e lumtur”, thotë ajo, “por më duhet edhe pak kohë që ta marr veten, sepse kam lindur me operacion”. Vendimi për prerje cezariane erdhi në fund të procesit nga mjekët e saj.