د اسرائیلو برید کې د ایران څو تنه لوی پوځی مشران وژل شوي دي

د اسرائیلو صدراعظم وايي چې د ایران په مختلفو هدفونو باندې د هیواد لومړني بریدونه په بشپړ ډول بریالي وو. رادیو فردا ، دآزادې اروپا / آزادي راډیو ایراني څانګه دبنیامین نتانیاهو له قوله رپوټ ورکوي چې په دغو بریدونو کې دایران څو کسه لوړ رتبه پوځیان هم په نښه شوي دي. اسرائیلي چارواکو د جمعې په سهار اعلان وکړ چې دوی د ایران په اټومي تاسیساتو باندې " واردمخه" برید ترسره کړی دی. د اسرائیلو صدراعئم د ایران محتمل انتقامي برید ته په اشاره وویل اسرائیلي اتباع ممکن د اوږدې مودې لپاره په پناه ځایونو کې پاتې شي او باید پوځي لارښوونې تعقیب کړي.