د اباسین اوبو موافقې ځنډولو پاکستاني کروندګر اندېښمن کړي

هند په وروستیو کې تر خپل واک لاندې کشمیر کې پر سیلانیانو د برید په غبرګون کې له پاکستان سره د اباسین اوبو موافقې ځنډولو اعلان وکړ. دې پرېکړې د پاکستان کروندګر اندېښمن کړي دي او وايي چې که اوبه ورباندې بندې شوې نو ځمکې به یې شاړې شي. پاکستان د نوي دلي اعلان رد کړی او وايي، د اوبو بندول به جنګي اقدام وبولي. د اپرېل پر ۲۲مه د کشمیر په پهلګام کې په برید کې ۲۶ تنه وژل شوي ول او د کشمیر مقاومت یا د مقاومت جبهې په نوم ډلې یې ذمه واري منلې وه. له هغه وخت راهیسې د اسلام اباد او نوي دلي ترمینځ ترینګلتیا خورا زیاته شوې ده.