د معلولينو نړيواله ورځ؛ د يوشمېر افغان معلولينو د ورځني ژوند کيسې، ستونزې او شکايتونه

نن د دسمبر درېیمه د معلوليت لرونکو کسانو نړیواله ورځ ده، په افغانستان کې یوشمېر معلولین د خپلو ژوند پر بېلابېلو برخو کې له ستونزو شکایت کوي. محبوبه چې د کابل د بګرامیو ولسوالۍ اوسېدونکې ده او شاوخوا دېرش کاله وړاندې یې په یوه پېښه کې یوه پښه پرې شوې، اوس له خپلې زړې مور سره په سخت اقتصادي وضعیت کې ژوند کوي. هغه وايي، د معلولیت له معاش پرته د خپل ژوند د مخته وړلو لپاره نور هيڅ عاید نه‌لري، خو د طالبانو حکومت نه یوازې دا چې د دوی معاشونه پر وخت نه ورکوي، بلکې د جمهوري نظام په پرتله يې خورا کم کړي هم دي.