Skal ikkje vere livstrugande skadd etter trafikkulykke

Personen, som blei alvorleg skadd i ein kollisjon like utanfor Selvågtunnelen i Ulstein på tysdag, skal ikkje vere livstrugande skadd. Det opplyser politiadvokat Sander Brink i Møre og Romsdal politidistrikt. Vedkomande blei frakta til St. Olavs hospital i Trondheim etter ulykka. I tillegg blei fire andre sendt til Volda og Ålesund sjukehus for undersøkingar etter trafikkulykka. Det er så langt uklart kva som er årsaka til ulykka. – Statens vegvesen si ulykkesgruppe er involvert for å gjere nærare undersøkingar av kva som skjedde, seier Brink.