Кыргызстан улуттук валюта сомду өзү басып чыгара баштады

Кыргызстан улуттук валюта сомду өзү басып чыгара баштаганын 27-мартта президент Садыр Жапаров Фейсбук баракчасына жазып, бул күндү "тарыхый күн" деп атады. "Өлкөбүздүн тарыхында алгачкы жолу улуттук валютабыз сомду өзүбүз басып чыгара баштадык. Буга чейин чет өлкөлөргө буйрутма берип, акча төлөп бастырып келген элек. Эми, тескерисинче, башка мамлекеттердин акчасын дагы буйрутма менен биз басып берүү деңгээлине чыктык. Акча чыгарууда талап кылынган шарттарды тастыктаган эл аралык тийиштүү сертификатыбыз да бар", - деп жазды мамлекет башчы.