АКШ Өзбекстандагы эки компаниянын жетекчилигине визалык санкция салды

АКШ Өзбекстандагы эки компаниянын жетекчилерине мыйзамсыз миграцияга көмөктөшкөнү үчүн визалык чектөө киргизди. Кошмо Штаттардын Мамлекеттик департаменти билдиргендей, бул компаниялардын жетекчилери жана жооптуу кызматкерлери чет өлкөлүктөрдү, анын ичинде балдарды Борбордук Америка аркылуу АКШга мыйзамсыз алып өтүүгө жардам берген. Мекеме тараткан билдирүүдө бул адамдар чет элдик жарандарды өткөрмө пункттарга жеткирүүнү активдүү координациялаганы, андан соң алардын көбү АКШга мыйзамсыз кирүүгө аракет кылганы айтылат.