Германия орусиялык "көмүскө флоттун" танкерин Балтика деңизине өткөрбөй койду

Германия Камерун желеги илинген Tavian танкерин Балтика деңизине өткөрбөй койду. Танкер Орусиянын "көмүскө флотуна" байланышы бардыгын Süddeutsche Zeitung, NDR жана WDR агенттиктери жазышты. Tavian танкери бир нече жолу аталышын жана идентификациялык маалыматтарын алмаштыргандыктан "танкер-зомби" деген атка конгон. Немис чек арачылары кемеде жалган желек менен жасалма номер илинген деп шек санашкан. Кийинчерээк Tavian танкери АКШ жана United Against Nuclear Iran уюму санкция тизмесине киргизген Tia кемеси экени аныкталган.