Балыкчы–Бөкөнбаев–Каракол жолун оңдоого жооптуу ишкананын жетекчиси кармалды

"Кыргыз жол курулуш" компаниясынын негиздөөчүсү Мирлан Исагалиев Балыкчы–Бөкөнбаев–Каракол автожолун куруу мөөнөтүнүн жана ченемдеринин одоно бузулушуна байланыштуу кармалып, Каракол шаардык милициясынын убактылуу кармоочу жайына киргизилгенин 27-декабрда Улуттук коопсуздук боюнча мамлекеттик комитет (УКМК) билдирди. Мекеменин маалыматына караганда, атайын кызматтын төрагасы Камчыбек Ташиевдин тапшырмасынын негизинде аталган ишкана жолдун үч тилкеси боюнча алган милдеттенмелерин кандай аткарып жатканы текшерилди.