Нөкіс оқиғасынан кейінгі екі жылда не өзгерді?

Қарақалпақстанның егемендігі мен Өзбекстан құрамынан шығу құқығы туралы баптарды Конституциядан алып тастауға бейбіт қарсылықты билік күшпен басып, аяғы үлкен қантөгіске ұласқан Нөкіс оқиғасына биыл екі жыл толды. 21 адам өліп, 200-ден астам адам жараланған (ресми дерек) оқиғадан кейін Ташкент халық пікірін ескеретінін айтып, даулы өзгерістерден бас тартқан. Бірақ қарсылық білдірген қарақалпақ белсенділерін жазалап, қудалауды күшейткен билік егемендікті мұрат еткен бірлестікті заңсыз етіп шығарды дейді құқыққорғаушылар.