10-მდე გაიზარდა ხარკოვზე რუსეთის დარტყმის მსხვერპლთა რიცხვი

7 მარტს, გამთენიისას რუსეთის მხრიდან უკრაინის ქალაქ ხარკოვზე განხორციელებული დარტყმის შედეგად დაღუპულთა რიცხვი ათ ადამიანამდე გაიზარდა. რაკეტის მოხვედრიდან მალევე შვიდი დაღუპულის შესახებ ვრცელდებოდა ინფორმაცია, კიდევ სამი ადამიანის ცხედრები შემდეგ ნანგრევებიდან ამოიტანეს. დაჭრილია სულ მცირე 15 პირი. ბალისტიკური რაკეტა მოხვდა ხუთსართულიან საცხოვრებელ სახლს. დაღუპულებს შორის არიან ბავშვები. ოთხი დაშავებული საავადმყოფოშია მოთავსებული, მძიმე მდგომარეობაშია 11 წლის ბიჭი. მაშველები განაგრძობენ ნანგრევებში მუშაობას.