საბერიოში მომხდარი ტრაგედიის გამო გლოვის ნიშნად სახელმწიფო დაწესებულებებზე დროშები დაუშვეს

საქართველოში 9 იანვარი გლოვის დღეა ოკუპირებული აფხაზეთის გალის რაიონში მომხდარი ტრაგედიის გამო. 5 იანვარს სოფელ საბერიოში ხანძრის შედეგად ხუთი ბავშვი დაიღუპა. მათ დღეს, 9 იანვარს, დაკრძალავენ. გლოვის ნიშნად ადმინისტრაციულ შენობებზე სახელმწიფო დროშები დაუშვეს. ინფორმაცია, რომ 9 იანვარი გლოვის დღედ გამოცხადდა, 8 იანვარს გაავრცელა მთავრობის ადმინისტრაციის პრესსამსახურმა. განკარგულებას ხელი მოაწერა „ქართული ოცნების“ მთავრობის პრემიერ-მინისტრმა ირაკლი კობახიძემ.  ტრაგედიის გამო, ოკუპირებულ აფხაზეთში გლოვა 6 იანვარს იყო გამოცხადებული.