Выдаўцы беларускіх кніг — «Людзі Cвабоды – 2024»

Выдаўцы беларускіх кніг, якія нясуць у сьвет вольнае слова, сталі ляўрэатамі прэміі «Людзі Cвабоды – 2024». Беларуская служба Радыё Свабода штогод прысуджае гэтую сымбалічную ўзнагароду тым, хто пашырае межы свабоды для сябе, Беларусі, сьвету. Масавыя рэпрэсіі, якія пачаліся пасьля жніўня 2020 году ў Беларусі, закранулі ня толькі палітыкаў, грамадзкіх актывістаў і ўдзельнікаў пратэстаў у самых розных іх формах. Пад перасьлед трапілі і дзеячы беларускай нацыянальнай культуры, у тым ліку паэты, пісьменьнікі і выдаўцы.