Видео төшерергә яраткан һәр баланың 100 мең сум приз алу шансы бар

(Казан, 20 октябрь, «Татар-информ», Рузилә Мөхәммәтова). «Милли мультfest» балалар кинофестивале конкурсында катнашучыларның 50, 70 һәм 100 мең сум приз алу шансы бар. «Татар-информ»да үткән матбугат конференциясендә оештыручылар фестивальдә катнашу шартлары белән таныштырды. Татар телен саклау һәм үстерү комиссиясе эшчәнлеге кысаларында «Милли мультfest» балалар кинофестивале игълан ителде. Конкурска балалардан анимацион һәм кыска метражлы фильмнар, шулай ук, компьютер уеннары номинациясендә эшләр кабул ителә.