Çeşme: Türkmen türmelerinde bendiler iýjek iýmitini özleri tapmaly bolýarlar

Türkmenistanyň türmelerinde saklanýan bendileriň döwlet tarapyndan azyk üpjünçiligi kesildi, diýip Azatlyk Radiosynyň Türkmenistandaky ygtybarly çeşmesi aýdýar. Onuň sözlerine görä, bu ýagdaý ýurduň Owadandepedäki ýapyk türmesinden başga tussaghanalarynyň ählisine degişli. "Türmelerde bendileri naharlandyrmak şu ýylyň başyndan başlap doly aýrylypdyr. Indi türmede ýatan raýatlaryň ýakyn hossarlary her aýda bir aýlap iýjek azyklaryny we gerek pullaryny yzyndan eltip bermeli edilipdir" diýip çeşmämiz belleýär.