Репрессеш лайначу къаьмнийн Кхеташоно дехар дина Путине, гIалгIайн протестийн лидерш маьршабаха аьлла

Оьрсийчуьрчу репрессеш лайначу къаьмнийн юкъаралло кхайкхам бина пачхьалкхан президенте Путин Владимире, 2019-чу шеран Зазадокху-баттахь Магасехь митингехь дакъалацарна лецна жигархой маьршабахар доьхуш. "Къилбаседа Кавказерчу къаьмнийн а, динан векалийн а юкъаметтигаш Iалашъярхьма оха тIедожжийна долу дехар до хьоьга адамалла гучуяккхий, лаьцна латтош болу гIалгIайн боламан жигархой Ужахов а, Барахоев а, Мальсагов а, Чемурзиев а, Хаутиев а, Нальгиев а, Саутиева а маьрша бохуш гIо лацахьара ахь", - аьлла ду бинчу кхайкхамехь.