Махсус хәрби операциядә катнашучылар һәм аларның гаиләләренең бер генә проблемасы да игътибардан читтә калырга тиеш түгел. Татарстан Рәисе Рөстәм Миңнеханов Казанда «Ватанны саклаучылар» дәүләт фонды филиалын ачу тантанасында шулай дип белдерде.
Республикада фондның бүлеге Ямашев проспектындагы Химиклар мәдәният сарае базасында урнашкан. Миңнеханов сүзләренчә, фонд эше махсус хәрби операциядә катнашучыларны борчыган мәсьәләләрне системалы рәвештә һәм югары һөнәри дәрәҗәдә хәл итү өчен өстәмә мөмкинлекләр булдырачак.